काठमाडौं – फिल्म ‘पूर्णबहादुरको सारङ्गी’पछि पहिलो पटक नायक विजय बराल शीर्ष भूमिकामा रहेको फिल्म ‘जनै हराएको मान्छे : सम्बन्धका धागा’हरुको ट्रेलर सार्वजनिक भएको छ ।

निर्माण पक्षले नयाँ बानेश्वरको एक हलमा शनिबार कार्यक्रमको आयोजन गरी ट्रेलर सार्वजनिक गरेको हो ।

ट्रेलरमा विदेश जाने सोचले गाउँ छाडेका नायक विजय बराल काठमाडौं संघर्षमै रुमालिएको देखाइएको छ । उनी वृद्ध बाकाे सहज बूढेसकालका लागि धन कमाउन कोरिया जाने उद्देश्यमा लागेको ट्रलेरले बताउँछ ।

यो फिल्म बुवा र छोराको सम्बन्धमा केन्द्रित रहेको ट्रेलरबाट बुझ्न सकिन्छ ।

ट्रेलरमा भावनात्मक संवादहरु पनि समावेश गरिएको छ । अन्तिमा विजयको संवाद छ, ‘आमाको लासभन्दा गह्रुङ्को भारी यो संसारमा कुनै भारीले हुँदैन रहेछ ।’

विजय र नायिका केकी अधिकारी दिदी–भाइको भूमिकामा रहेको ट्रेलरमा खुलाएको छ । नायिका मिरुना मगरसँग भने विजय प्रेम सम्बन्धमा रहेको ट्रेलरले प्रस्ट पारेको छ । कलाकार भोलाराज सापकोटाले भने विजयको बुवाको भूमिका निर्वाह गरेका छन् ।

एक ग्रामिण परिवेशको युवकले सहरमा खाने ठक्करको घटनामा फिल्म बनेको ट्रेलरले बताउँछ ।

यस फिल्ममा विजय, केकी, मिरुना, भोलासहित सुशांक मैनाली, गौरव पहाडी र रेयर राईलगायत अभिनय रहने बताइएको छ ।

यो फिल्मको प्रदर्शन मिति भदौ ६ लाई तोकिएको छ । हिमाल न्यौपानेको निर्देशनमा बनेको यो फिल्मको लेखक भानुक्त ढकाल हुन् ।

पेपरक्लिप ब्यानरमा निर्माण भएको यस फिल्मको निर्माता कमल न्यौपाने र विमल न्यौपाने हुन् ।