कीर्तिपुर – श्रावण शुक्ल पूर्णिमाको भोलिपल्ट अर्थात्‌ प्रतिपदादेखि अष्टमीसम्म आठ दिन मनाइने गाईजात्रा आजदेखि सुरु भएको छ । देशभरका नेवारी बस्तीमा ‘गाईजात्रा’ चलिरहँदा काठमाडौँको कीर्तिपुरबासीले भने ‘सापारु’ निकालेका छन्‌ ।

पितृगणको सम्झना र गणना गर्ने पर्व गाईजात्रालाई नै नेपाल भाषामा ‘सापारु’ भनिन्छ । कीर्तिपुरमा प्रत्येक वर्ष सापारु पर्व हर्षोल्लासका साथ मनाउने गरिन्छ ।

सापारु पर्व कीर्तिपुरका टोलहरूले आलोपालो आयोजना गर्छन्‌ । यो वर्ष सापारु आयोजना गर्ने जिम्मा कीर्तिपुर नगरपालिका-३ मा दुई टोल सागल र कुतुसाले पाएका छन्‌ । सापारु आयोजना गर्न कीर्तिपुरमा ‘सागः कुतुसा आखाः खलः सायाः ग्वसाः खलः ११४५’ नै गठन गरिएको छ ।

खलः ले कीर्तिपुरबासीहरूलाई यो वर्ष निधन भएकाको तस्बिर उपलब्ध गराउन यसअघि नै अनुरोध गरेको थियो । सोही अनुरोधअनुसार उपलब्ध तस्बिरहरू सापारुमा देखाइएको छ ।

कीर्तिपुरमा यस वर्ष सापारु मनाउन सागः कुतुसा आखाः खलःको अध्यक्षमा रामशरण महर्जन र उपाध्यक्षमा ज्ञानलक्ष्मी डङ्गोल नियुक्त भएका छन्‌ ।