काठमाडाैं । नेपाली कांग्रेसले पार्टी विरुद्ध गतिविधिमा संलग्न भएको भन्दै देशभरका २६ जना नेता तथा कार्यकर्तालाई सचेत गराएको छ। कांग्रेस केन्द्रीय अनुशासन समितिले बिहीबार जारी गरेको विज्ञप्तिमा उनीहरूलाई अबदेखि पार्टी हितविपरीत कुनै पनि कार्य नगर्न औपचारिक चेतावनी दिइएको उल्लेख गरिएको छ।

समितिका अनुसार २०७९ सालको स्थानीय, प्रदेश र संघीय निर्वाचनमा पार्टीले समर्थन गरेका उम्मेदवारलाई असहयोग गरेको आरोपमा उजुरी परेका कार्यकर्तामध्ये कैलालीका २ जना, डोल्पाका १० जना, सल्यानका ११ जना, दैलेख, खोटाङ र धनुषाका १–१ जना गरी जम्मा २६ जनालाई सचेत गराउने निर्णय गरिएको हो।

केन्द्रीय अनुशासन समितिका संयोजक आनन्दप्रसाद ढुंगानाका अनुसार, प्राप्त अन्य उजुरीहरू अझै पनि छानबिनको प्रक्रियामा रहेका छन्।

त्यसैगरी, निर्वाचनमा पार्टी वा पार्टीद्वारा समर्थन प्राप्त उम्मेदवारविरुद्ध स्वतः उम्मेदवारी दिएका, तिनका प्रस्तावक तथा समर्थक बनेर विधानविपरीत कार्यमा संलग्न भएका कारण स्वतः निष्कासनमा परेका व्यक्तिहरूले आफूविरुद्धको कारबाही फुकुवा गर्न पुनरावेदन दर्ता गराएका छन्।