काठमाडौं– ४० किलोग्राम लागूऔषध गाँजा र १ लाख २५ हजार नगदसहित पाँच जना पक्राउ परेका छन् । 

पक्राउ पर्नेमा धादिङको गजुरी गाउँपालिका ४ घर भएका १९ वर्षीय निराजन चेपाङ, १९ वर्षीय प्रकाश चेपाङ, २० वर्षीय शंकर चेपाङ,  ३६ वर्षीय जीवन प्रजा र ३८ वर्षीय सुमन चेपाङ रहेका छन् । 

काठमाडौं महानगरपालिका ३२ पाल्पाकोट चोक कोटेश्वरमा लागूऔषध गाँजा (पोलेन) को कारोबार भइरहेको भन्ने सूचनाको आधारमा जिल्ला प्रहरी परिसर तथा काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले उनीहरूलाई कोटेश्वरस्थित एक घरमा डेरा गरी बस्ने सुमन चेपाङको कोठाबाट ४० किलोग्राम लागूऔषध गाँजा (पोलेन), १ लाख २५ हजार रुपैयाँ नगद र अन्य दसीका सामानहरूसहित बुधबार पक्राउ गरेको हो । 

उनीहरूका साथबाट १५० र २२० पल्सर दुई मोटरसाइकल र ३ थान मोबाइल पनि बरामद गरेको छ । उनीहरूलाई काठमाडौं जिल्ला अदालतबाट दिन ७ (सात) को म्याद थप अनुमति लिई थप अनुसन्धान भइरहेको  प्रहरीले जनाएको छ ।