काठमाडौं– पछिल्लो एक सातामा देशभर ८६ जनामा डेंगु सङ्क्रमण पुष्टि भएको छ। यो सँगै नेपालमा डेंगु संक्रमितको सङ्ख्या १ हजार ८ सय ९० पुगेको छ । 

स्वास्थ्य सेवा विभागअन्तर्गत इपिडिमियोलोजी तथा रोग नियन्त्रण महाशाखा ईडीसीडीले सार्वजनिक गरेको तथ्यांक अनुसार ६ प्रदेशमा ८६ जनामा डेंगु सङ्क्रमण पुष्टि भएको हो । 

डेंगु देखिएका प्रदेशमध्ये गण्डकीमा सबैभन्दा बढी (३१ जना) संक्रमित थपिएका छन् भने बागमतीमा २३, लुम्बिनीमा १५, कोशीमा ७, सुदूरपश्चिम ७ र मधेश प्रदेशमा ३ जना डेंगु संक्रमित भएका महाशाखाले जनाएको छ । 

सफा पानी जम्मा भएको भाँडो वा ठाउँमा हुर्कने एडिज जातको लामखुट्टेको टोकाइबाट डेंगुको सङ्क्रमण हुने भएकाले घर वरिपरि पानी जम्न नदिन र लामखुट्टेको टोकाइबाट बच्न चिकित्सकहरू सुझाउँछन् ।