काठमाडौं- सोलुखुम्बुस्थित गोक्यो तालमा हामफाल्न लागेका एकजना चिनियाँ पर्यटकलाई नेपाल प्रहरीले उद्धार गरेको छ ।

पर्यटक प्रहरी कार्यालय, भृकुटीमण्डपबाट खटिएको टोलीले चिनियाँ नागरिक छेई हुवाङलाई मंगलबार बिहान उद्धार गरेको हो ।

३६ वर्षीय हुवाङले आफ्नै जन्मदिन (११ जुन) को दिनमा समुद्री सतहबाट ५ हजार मिटर उचाइको गोक्यो तालमा आत्महत्या गर्ने भनेर सामाजिक सञ्जालमा लेखेका थिए ।

सामाजिक सञ्जाल हुवाङको पोस्ट देखेपछि चीनस्थित उनको परिवारले काठमाडौंस्थित चिनियाँ दूतावासलाई खबर गरेका थिए ।

दूतावासले नेपाल प्रहरीअनर्गतको पर्यटक प्रहरीलाई घटनाबारे जानकारी गराउँदै तत्काल उद्धारका लागि अनुरोध गरेको थियो। यस घटनाबारे पेम्बा शेर्पा पनि प्रहरीलाई जानकारी गराएका थिए।

प्रहरीकाअनुसार चिनियाँ दूतावासकै सहयोगमा हाई अल्टिच्युड हेलिकप्टर व्यवस्था गरिएको थियो। उद्धार टोली घटनास्थलमा पुग्दा हुवाङ गोक्योस्थित थाङ्का इन होटल’मा भेटिए ।

प्रहरीका अनुसार होटल सञ्चालकले उनलाई सम्झाइरहेका थिए । ती चिनियाँले सुरूमा त प्रहरीको अनुरोध अस्वीकार गरेर मर्ने बताएका थिए ।

हुवाङले प्रहरीलाई जन्मदिनको दिन बुधबार आत्महत्या गर्ने योजना बनाएको बताएका थिए।

करिब आधा घण्टा लामो कुराकानीपछि उनी काठमाडौं फर्किन तयार भए । उनलाई प्रहरीले हेलिकप्टरमार्फत काठमाडौं लगिसकेको छ।

पर्यटक प्रहरी कार्यालय, भृकुटीमण्डपमा राखिएका उनलाई चिनिया दूतावासको जिम्मा लगाइँदैछ ।