एजेन्सी – भारतले जारी लडाईंमा पाकिस्तानका सैन्य अड्डामै हवाई हमला भएको दाबी गरेको छ । कमभन्दा कम कोल्याटरल ड्यामेज (सर्वसाधारणको कम क्षति) हुनेगरी पाकिस्तानका सैन्य अखडामा हमला गरिएको भारतीय सेनाले जनाएको हो ।

भारतीय सेनाकी कर्नेल सोफिया कुरैशीले शनिबार प्रेस ब्रिफिङ क्रममा पाकिस्तानले पनि आफ्ना सैन्य अड्डालाई निसाना बनाएको स्वीकारिन्‌ । उनले भनिन्, ‘पाकिस्तानले हाम्रा सैन्य अड्डालाई जानाजान निशाना बनायो, त्यसपछि भारतीय सशस्त्र बलले पनि सुनियोजित तरिकाले जवाफी हमला गर्‍यो ।’

पाकिस्तानका प्राविधिक गुप्तचरी अड्डा, कमाण्ड एण्ड कन्ट्रोल स्टेशन, राडार साइट्स र हतियार भण्डार छनोट गरी निशाना बनाइएको कुरैशीले दाबी गरिन्‌ ।

‘रफीकी, मुरीद, चकलाला, रहीमयार खान, सुक्कुर र चुनियास्थित पाकिस्तानी सैन्य अड्डामाथि सटिक हतियार र युद्धक विमानबाट प्रहार गरिएको हो’, कुरैशीले थपिन्‌, ‘पाकिस्तानको पसरूरस्थित रडार साइट र सियालकोटको हवाई शिविरलाई पनि भारतले निशाना बनायो ।’