काठमाडौं– नेकपा माओवादी केन्द्रका अध्यक्ष पुष्पकमल दाहाल प्रचण्डले कम्युनिष्ट आन्दोलनलाई क्रान्तिकारी आदर्श र निष्ठातर्फ अघि बढाउन धेरै चुनौति रहेको बताएका छन् ।

पार्टी केन्द्रीय कार्यालय पेरिसडाँडामा शनिबार आयोजित निर्मल लामाको २५औं स्मृति दिवस कार्यक्रममा प्रचण्डले प्रतिक्रियावादीहरूले आफूहरुमाथि भ्रम छर्ने र षड्यन्त्र गर्ने गरेको भन्दै कम्युनिष्ट आन्दोलनलाई क्रान्तिकारी आदर्श र निष्ठातर्फ अघि बढाउन धेरै चुनौति रहेको बताएका हुन् ।

उनले बिचार, मुद्दा र वर्गलाई केन्द्रीत गरेर एकपटक यथास्थितिलाई भत्काउँदै रूपान्तरणसहित समाजवादी क्रान्तिलाई अघि बढाउन खोजेको उल्लेख गरे । इतिहासबाट राम्रा कुरा सिकेर क्रान्तिलाई अगाडि बढाउने संकल्प गर्दा प्रतिक्रियावादी र अवसरवादीहरूले नेतृत्वमाथि हमला गर्न सक्ने भएकाले सचेत हुनुपर्ने उनले बताए ।

प्रचण्डले राजनीतिक मुद्दा केन्द्रीत भएर समाजवादको आधार तयार गर्न अविचलित भएर अघि बढ्नुपर्ने धारणा राखे ।