वाशिंटन – अमेरिकी राष्ट्रपति डोनाल्ड ट्रम्पले केही देशमा लगाएको ट्यारिफको निर्णयबाट फिर्ता हुने निर्णय गरेपछि त्यहाँको शेयर मार्केट चुलिएको छ । यो निर्णयबाट पछि हटे पनि परम्परागत १० प्रतिशत आयात कर भने यथावतै रहेको छ ।

धेरै व्यापारिक साझेदारसँग वार्ताको क्रम जारी रहेका कारण बुधबार रातिबाट लगाइने भनिएको ट्यारिफको निर्णय हालका लागि स्थगित भए पनि चीनबाट अमेरिका पुग्ने सामानमा लगाइएको करको दायरा भने १२५ प्रतिशत हुने भएको छ ।

ट्रम्पको स्थगनको निर्णयपछि एस एन्ड पीको शेयर मार्केट ९.५ प्रतिशतले बढेको छ । लगातार केही दिन ओरालो लागेको शेयर मार्केटमा एकै दिनमा यो दरको वृद्धि सन् २००८ पछि पहिलो पटक भएको हो ।

विशेषज्ञले अन्य देशसँगको सम्बन्ध कायम गर्दै ट्रम्प आफ्नो निर्णयबाट पछि हट्ने अपेक्षा गरेका छन् । तथापि चीनसँगको सम्बन्ध सुमधुर हुनका लागि भने समय लाग्न सक्ने जनाइएको छ ।

एकै दिनमा नाइकको शेयरमा ११ प्रतिशतले वृद्धि भएको छ भने एप्पलको शेयरमा १५ प्रतिशतले वृद्धि भएको छ । ट्रम्पले यो स्थगनको निर्णय गर्नु अघि राष्ट्रिय रिटेल फेडरेसनले अमेरिकामा २० प्रतिशत मात्र सामान भित्रने चेतावनी दिएको थियो ।