सिरिया – सिरियाका नेता अहमद अल साराले अलावट क्षेत्रमा भएको हिंसामा संलग्न कसैलाई नछाडिने बताएका छन्। बेलायतको सिरियन अब्जरभेटरी फर ह्युमन राइट्सले शुक्रबार र शनिबारको सो हिंसामा ८३० सर्वसाधारण मारिएको जनाएको छ। सो हिंसा आसाद शासनको पतन पछिकै सबै भन्दा ठुलो हो।

सो झडपमा सुरक्षा निकायका २३१ तथा आसाद समर्थक २५० मारिएका छन्। मर्नेको मूल सङ्ख्या १३११ पुगेको जनाइएको छ। उनले पुरानो सत्ताले देशलाई गृह युद्धमा लैजान चाहे पनि त्यो सम्भव नहुने बताए।

न्युज एजेन्सी सानाले पोस्ट गरेको भिडियोमा साराले कोही पनि कानुन भन्दा माथि नरहेको बताउँदै यसको संलग्न सबै जना कारबाहीको भागिदार हुने बताए।

आइतबार नै उनले यसको छानबिनका लागि स्वतन्त्र कमिटी निर्माण गर्ने बताएका थिए। आइतबार सो हिंसात्मक घटनाको विरोध गर्न हजारौँ सिरियाली राजधानी दमासकसको मार्जेह चोकमा जम्मा भएका थिए।

यो घटनाले अलावाइटलाई हिंसात्मक क्षेत्रमा परिणत गरेको छ। त्यहाँका धेरै मानिस भागेर लाताकियामा रहेको रुसी सेनाको बेस क्याम्पसम्म पुगेका छन्। दर्जनौँले रुसी सुरक्षा चाहियो भन्दै नारा समेत लगाएको भिडियोमा देखिएको छ।

स्थानीय सञ्चार माध्यमले धेरै जना भागेर लेबनान पुगेको जनाएका छन्। सिरियाका लागि संयुक्त राष्ट्र सङ्घका दूत जियर पिडरसनले सर्वसाधारण माथिको हमला दु:खद भएको प्रतिक्रिया दिएका छन्।