धादिङ – पृथ्वी राजमार्गअन्तर्गत धादिङको गल्छी गाउँपालिका–४ मास्टारमा आज जिपको ठक्करबाट एक पैदलयात्रीको मृत्यु भएको छ ।
काठमाडौँबाट गजुरीतर्फ आउँदै गरेको बाप्र ०१–०२७ च ०३४० नम्बरको जिपको ठक्करबाट सडक छेउमा हिँडिरहेका गल्छी–४ मास्टारका ७० वर्षीय यज्ञराज अधिकारीको मृत्यु भएको हो ।
ठक्करबाट गम्भीर घाइते भएका अधिकारीलाई उपचारका लागि प्राथमिक स्वास्थ्य केन्द्र गजुरी पठाइएको थियो । चिकित्सकले उनलाई मृत घोषणा गरेको जिल्ला प्रहरी कार्यालयका प्रहरी उपरीक्षक भेषराज रिजालले जानकारी दिए।
घटनापछि स्थानीयवासी केही बेर सडक अवरुद्ध गरेका थिए । ठक्कर दिने जिपका चालकलाई प्रहरीले नियन्त्रणमा लिएको छ ।
प्रतिक्रिया