काठमाडौं – कर्तव्य ज्यान मुद्दाका फरार अभियुक्त विनोद विकलाई प्रहरीले पक्राउ गरेको छ ।

प्रहरीका अनुसार नुवाकोटको लिखु गाउँपालिका–६ का २९ वर्षीय विकलाई केन्द्रीय अनुसन्धान ब्यूरोको टोलीले कात्तिक २३ गते काठमाडौं तारकेश्वर नगरपालिका–५, अर्यालटारबाट पक्राउ गरेको हो। उनलाई पक्राउ गरी पुनः जगन्नाथदेवल कारागार, सुन्धारामा बुझाइएको छ।

विकले २०७७ साल असार १३ गतेदेखि उक्त कारागारमा कैद भुक्तान गरिरहेका थिए। तर, २०८२ साल भदौ २४ गते भएको जेनजी आन्दोलनका क्रममा सुन्धारास्थित कारागारबाट फरार भएका थिए।

फरार भएपछि सीआईबीले उनलाई खोजी सूचीमा राख्दै देशभर खोजतलास जारी गरेको थियो। पाँच वर्ष कैद भुक्तान गरिसकेका विनोदको अझै २० वर्ष कैद बाँकी रहेको प्रहरी वरिष्ठ उपरीक्षक एसएसपी शिवकुमार श्रेष्ठले जानकारी दिए ।