काठमाडौं- गत भदौ २३ र २४ गतेको जेन-जी आन्दोलनपछि अन्तरिम सरकार बनाउने प्रक्रियालाई प्रतिगामी षडयन्त्र भन्दै नेकपा एमाले पालिकामा जाने भएको छ।

एमालेले आयोजना गरेको पालिकास्तरीय जनपरिचालन कार्यक्रमलाई भव्य बनाउन भन्दै महासचिव शंकर पोखरेलले पाँच बुँदे निर्देशन दिएका छन् ।

पोखरेलले सामाजिक सञ्जालमार्फत् कार्यकर्ताहरूलाई जनपरिचालनमा सहभागी हुने संख्या हेरेर आवश्यकता आधारमा पार्टीको झण्डा, ब्यानर र प्लेकार्ड तयार गर्न निर्देशन दिएका हुन् ।

यसैगरी जनपरिचलनका लागि घना बस्ती भएको क्षेत्र छनोट गर्न पनि उनले भनेका छन् । घना बस्ती भएका ठाउँमा जनसंख्या धेरै हुने भएकोले जनपरिचालनमा सहभागी जुटाउन सहज हुने पोखरेलको निचोड छ।

यस्तै जनप्रर्दशनको अन्त्यमा छोटो तर प्रभावकारी कोणसभा गर्न उनले कार्यकर्तालाई निर्देशन दिएका छन् ।

जनप्रदर्शनका क्रममा भिडियो-फोटोहहरू सामाजिक सञ्जालमा भाइरल हुने गरी शेयर गर्न पनि उनले भनेका छन् । त्यस्ता सामग्रीहरू आमसञ्चारमाध्यममा पठाउन पनि महासचिव पोखरेलले भनेका छन् ।

एमालेको गत असोजक २९ देखि ३१ गतेसम्म भएको केन्द्रीय कमिटी बैठकले प्रतिगामी षडयन्त्रविरुद्ध देशैभर जनपरिचालन गर्ने निर्णय गरेको थियो । जसअनुसार शनिबार सबै वडाहरूमा एमालेले भेला सम्पन्न गरेको छ ।

एमालेका सात नारा

प्रतिगामी षडयन्त्र- मुर्दावाद ।
विघटित प्रतिनिधिसभा- पुनर्स्थापना गर ।
२३ र २४ को अपराधिक घटनाको- निस्पक्ष छानबिन गर ।
तोडफोड, लुटपाट, आगजनीमा संलग्न अपराधीलाई- कारबाही गर ।
हत्या, हिंसा, आतंक- बन्द गर ।
नेकपा(एमाले)- जिन्दावाद ।
जनताको बहुदलीय जनवाद- जिन्दावाद ।