काठमाडौं– राष्ट्र, राष्ट्रियता, धर्म–संस्कृति र नागरिक बचाउ अभियानका संयोजक दुर्गा प्रसाईंले सुकुम्बासीका लागि स्थायी बसोबासको व्यवस्था मिलाउन आग्रह गरेका छन् ।

आइतबार काठमाडौँको मनोहरा सुकुम्बासी बस्तीमा पुगेर प्रसाईंले सुकुम्बासीलाई उठाउने नाममा पटक पटक दु:ख दिनुभन्दा स्थायी बसोबासको व्यवस्था मिलाउन काठमाडौं महानगरपालिकाका मेयर बालेन्द्र साहलाई भनेका हुन् ।

उनले बालेनको योजनामा काठमाडौं महानगरले बस्ती खाली गर्न आए प्रतिकार गर्न पनि सुझाव दिएका छन् । आफूहरू सुकुम्बासीको साथमा रहेको भन्दै उनले सुकुम्वासीहरू एक भए कसैले हटाउन नसक्ने बताए ।

उनले सुकुम्बासी बस्ती उठाउनु भन्दा बालमन्दिर र पशुपतिमा रहेका अनाधिकृत संरचना हटाउन सुझाव पनि बालेनलाई दिएका छन् ।

आफूले गरिवको ऋण मिनाहा गर्न सुझाव दिँदै राज्य नै आफूविरुद्ध लागेको उनले बताएका छन् । प्रसाईंले सुकुम्बासीलाई दलहरूले भोट बैंकका रूपमा मात्रै प्रयोग गरेको भन्दै सजग हुन आग्रह गरेका छन् ।