काठमाडौं– राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले प्रदेश संरचना तत्काल खारेज गर्नुपर्ने माग गरेका छन् ।

उनले आज सामाजिक सञ्जाल फेसबुकमार्फत मधेस प्रदेश सरकारमा भएको राजनीतिक परिवर्तनको विषयलाई लक्षित गर्दै राष्ट्र विखण्डनको आधार बन्न सक्ने प्रदेश संरचना खारेज गर्नुपर्ने उल्लेख गरेका छन् ।

उनले मधेस प्रदेशमा पछिल्लो पटक २५ दिनमै सरकार ढलेको उल्लेख गर्दै तीन वर्षमा चार मुख्यमन्त्री बनेको बताएका छन् ।
उनले लेखेका छन्– ‘२५ दिनमा मधेस प्रदेश सरकार ढल्यो, ३ वर्षमा चार मुख्यमन्त्री ।’

उनले प्रदेश संरचनालाई राजनीतिक अस्थिरता, भ्रष्टाचारको अखडा भएको टिप्पणी गर्दै अर्थतन्त्रले समेत धान्न नसक्ने भएकाले खारेज गर्नुपर्ने तर्क गरेका छन् ।

उनी लेख्छन्– ‘अस्थिरता र भ्रष्टाचारको अखडा, देशको अर्थतन्त्रले धान्न नसक्ने, राष्ट्र विखण्डनको आधार बन्न सक्ने प्रदेश संरचना तत्काल खारेज गरिनु पर्छ ।’