काठमाडौं – राष्ट्रिय स्वतन्त्र पार्टी (रास्वपा)का सचिवालय सदस्य दीपक बोहोराले पार्टीभित्रका संवाद र मिडियामा आएका रिपोर्टहरूबारे स्पष्ट पार्दै कुनै व्यक्ति वा दलसँग पद वा भूमिकासम्बन्धी छलफल नभएको बताएका छन्।

बिहीबार साँझ सामाजिक सञ्जाल फेसबुकमा स्टाटस लेख्दै उनले भनेका छन्, “निकै अघिदेखि सीके राउतदेखि गोपी हमाललगायत नयाँ राजनीतिक शक्ति र समूहहरूसँग संवाद भइरहेको छ। बालेन र कुलमानहरूसँग त पार्टी गठन हुनु अगाडिदेखि नै कुरा चल्दै आएको हो। तर कुनै पनि व्यक्ति वा दलसँग पद वा भूमिकाको बारेमा कुरा भएको छैन।”

उनले जेनजी आन्दोलनपछि नयाँ राजनीतिक शक्ति र व्यक्तिहरूसँग संवादका लागि कार्यदल नै गठन गरिएको बताए। बोहोराको भनाइमा, “समाचार बन्ने भए तथ्य यही हो, बाँकी कथा–कहानी जोड्नु नपरोस्।”

पार्टीभित्रका आधिकारिक पदाधिकारी र प्रवक्तालाई जानकारी नदिई मिडियामा हतारमा निष्कर्ष निकाल्ने प्रवृत्तिप्रति उनले असन्तोष जनाएका छन्। बोहोराले लेखेका छन्, “पार्टीमा पदाधिकारी छन्, प्रवक्ता र सहप्रवक्ता छन्। कसैलाई नसोधी मिडिया ट्रायल गर्न मिल्दैन।”