काठमाडौं – एएफसी एसिया कप २०२७ को छनोट अन्तर्गतको तेस्रो चरणमा नेपाल भियतनामसँग ३–१ गोलअन्तरले पराजित भएको छ। पहिलो हाफसम्म सन्तुलित प्रदर्शन गर्दै खेललाई बराबरीमा राख्न सफल भएको नेपाल दोस्रो हाफमा भने दबाब झेल्न बाध्य बन्यो।

खेलको नवौं मिनेटमै ताइन लिन्हले गरेको गोलमार्फत भियतनामले अग्रता लिएको थियो। तर, नेपालका सनिश श्रेष्ठले १७ औँ मिनेटमा बराबरी गोल गर्दै टोलीलाई खेलमा फर्काए। पहिलो हाफमै भियतनामले अर्को गोल गरेको थियो, तर अफसाइडको कारण त्यो गोल अस्वीकृत भयो।

पहिलो हाफको अतिरिक्त समयमा नेपालका लकेन लिम्बुले रातो कार्ड पाएपछि टोली १० खेलाडीमा सीमित रह्यो। यही कारण दोस्रो हाफमा नेपाली टोलीमा समन्वय कमजोर भयो र भियतनामले खेलमा पूर्ण नियन्त्रण जमायो।

६७ औँ र ७२ औँ मिनेटमा लगातार दुई गोल गर्दै भियतनामले सहज जित सुनिश्चित गर्‍यो। नेपालका गोलरक्षक किरण राईले केही उत्कृष्ट बचाउ गरे पनि परिणाम आफ्नो पक्षमा मोड्न सकेनन्।

यस हारसँगै नेपालका लागि आगामी खेलहरूमा पुनरागमन गर्ने दबाब थपिएको छ, जबकि भियतनामले यस जितसँगै समूह चरणमा बलियो स्थिती कायम गरेको छ।