काठमाडौं– एमाले महासचिव शंकर पोखरेलले एमाले अध्यक्ष केपी ओली विरुद्ध घृणा फैलाएको भन्दै सो संस्कार नेपालको संस्कार नभएको बताएका छन् । बिहीबार भक्तपुरको गुण्डुमा एमालेले आयोजना गरेको कार्यक्रममा बोल्दै महासचिव पोखरेलले सो बताएका हुन् ।

‘द्वन्द्व भएको समयमा मानवीय क्षति भएको बेलामा कहिले कुन प्रधानमन्त्री दण्डित भएको छ भन्नु त ?’, उनले भने ‘राणा शाहीको विरुद्धमा आन्दोलनको समयमा प्रधानमन्त्री भएका मोहन शमशेरलाई ७ सालको आन्दोलनपछाडि फेरि अन्तरिम सरकारको प्रधानमन्त्री बनाएको समाज हो नेपाली समाज ।’

उनले अहिले समाजमा भएको घृणाको राजनीति भएको भन्दै सो हाम्रो हो भन्दै प्रश्न गरेका छन् । उनले पञ्चायती व्यवस्थाको अन्त्यपछि पनि पञ्चायती व्यवस्थाका व्यक्तिहरू र दलका प्रतिनिधि मिलेर सरकार बनाएको बताए ।

‘आज सुशीला कार्की नेतृत्वको सरकारले नेपालको आफ्नै परम्पराका विपरित जुन नीति गृहमन्त्रीको निर्देशनमा अवलम्बन गरेको छ, त्यो नेपाली परम्परा होइन’, उनले भने ।