काठमाडौं – जेनजी आन्दोलनका क्रममा नख्खु जेलमा पुगेको भिडले पूर्वराज्यमन्त्री संजयकुमार साहलाई समेत बाहिर निकालेको छ।

साहलाई संजय ‘टकला’ नामले चिनिन्छ। आन्दोलन उग्र बन्दै जाँदा रास्वपा सभापति रवि लामिछानेसहित अन्य कैदीहरू जेलमुक्त भएपछि उनी पनि बाहिरिएका हुन्।

जनकपुरका साह १२ वर्षदेखि जन्मकैदको सजाय भोगिरहेका थिए। उनीमाथि २०६९ साल बैशाख १८ गते जनकपुरको रामानन्द चौकमा भएको बम विस्फोटमा संलग्न भएको आरोप छ, जसमा पाँचजनाको ज्यान गएको थियो। त्यस्तै, सञ्चार उद्यमी अरुण सिंहानियाको हत्या योजनामा पनि उनको नाम जोडिएको छ।

जेलबाट बाहिरिएपछि साहले सामाजिक सञ्जालमार्फत आफू निर्दोष भएको दाबी गरेका छन्। न्यायालय र दलहरूको आडमा निर्दोषलाई दोषी ठहर गरिने गलत अभ्यासकै सिकार आफू भएको उनले बताएका छन्। साथै, उनले जेनजी आन्दोलनको खुलेर प्रशंसा गरेका छन्।