काठमाडौं – राष्ट्रिय क्रिकेट टोलीका पूर्वकप्तान तथा नेपाल क्रिकेट संघ (क्यान)का वर्तमान सचिव पारस खड्काले जारी आन्दोलनको क्रममा संयमता अपनाउन सबैलाई आग्रह गरेका छन्। सामाजिक सञ्जालमार्फत उनले आफ्नो धारणा सार्वजनिक गर्दै यो विद्रोहमा जनताको जीत भइसकेको भन्दै अब नयाँ नेपालको निर्माणतर्फ लाग्नुपर्ने बताएका छन्।

“यो विद्रोहमा यहाँको जीत भइसकेको छ। परिवर्तनको यो लडाइँमा अब सबैजनाले संयमता अपनाई नयाँ नेपालको सिर्जनामा सहयोग गर्नुहोस्,” उनले लेखेका छन्।

उनले आक्रोश र रिसलाई सकारात्मक सोच र योजनामा बदल्नुपर्नेमा जोड दिएका छन्। खड्काले भनेका छन्, “यो रिसलाई अब देश बनाउने सोच, विचार अनि योजनामा बदल्नुपर्छ। हामी अघिल्लो पुस्ताभन्दा फरक छौँ भनेर प्रमाणित गर्ने योभन्दा सही समय अरू हुँदैन।”

पारसले सबै आन्दोलनकारी र नागरिकलाई संयमित भएर अगाडि बढ्न आग्रह गर्दै नयाँ नेपाल निर्माणमा एकताबद्ध भई लाग्नुपर्ने संदेश दिएका छन्।