काठमाडौं- नेपाली कांग्रेसका महामन्त्री गगन थापाकी श्रीमती डा. अञ्जना केसी थापाले साना छोराछारी, वृद्धवृद्धा र अशक्त बसिरहेको आफ्नो घरमा प्रदर्शनकारीले आगो लगाएकोमा दुःख व्यक्त गरेकी छिन् । सामाजिक सञ्जालमा पोस्ट गर्दै उनले आफ्नो घरमा १४ र ११ वर्षका दुई जना छोरीहरु, ७० वर्षमाथिका वृद्धवृद्धा र अशक्त सदस्य रहेको जनाएकी छिन् ।

परिवारका सदस्य बसेको घरमा प्रदर्शनकारीले आगो लगाएको भन्दै जेनजीप्रति आक्रोश व्यक्त गरेकी छिन् । ‘जेनजीले साँच्चै यही चाहेका हुन् ?’ उनले लेखेकी छिन् ।

उनले यो प्रदर्शनमा हाम्रा जेनजीको मात्रै उपस्थित भएकोमा आफूलाई विश्वास नरहेको पनि उल्लेख गरिन् । आफ्ना केटाकेटीले रगत र मृत्यु नचाहेको उनको भनाइ छ ।

उनीहरुले परिवर्तन चाहेको र गगनले सधैँ यसैका लागि संघर्ष गरिरहेको उनले लेखेकी छिन् । उनले आफ्ना केटाकेटीले रगतको खोलोमा नुहाउन खोजेकोमा आफूलाई विश्वास नरहेको बताइन् ।

यसअघि प्रदर्शनकारीले रातोपुलस्थित महामन्त्री थापाको घरमा आगजनी गरेका थिए । अहिले मुलुकका विभिन्न स्थानमा व्यापक प्रदर्शन भइरहेको छ ।

प्रदर्शनकारीले दलका नेताहरुलाई निशाना बनाएका छन् ।