काठमाडौं– सत्तारूढ नेकपा (एमाले)को भ्रातृ संगठन अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) का अध्यक्ष डा. सुजन कडरियाले राजीनामाको घोषणा गरेका छन् । 

सामाजिक सञ्जाल फेसबुकमार्फत् अध्यक्ष कडरियाले पदबाट राजीनामा दिएको घोषणा गरेका हुन् । ‘हिजो विद्यार्थी राजनीतिको शिर ढलेको दिन,’ उनले लेखेका छन्, ‘विद्यार्थीहरूको हक, अधिकार र भविष्यको संरक्षक, पथ प्रदर्शक विद्यार्थी संगठनहरूले आज स्कुले पोशाकमा रहेको विद्यार्थीको प्राण रक्षा समेत गर्न सकेन ।’

अध्यक्ष कडरियाले लेखेका छन्, ‘तसर्थ, समग्र हाम्रो पुस्ताले गरेको विद्यार्थी राजनीति असफल रहेको महशुस गर्दै अखिल केन्द्रीय समितिको अध्यक्षबाट राजीनामा दिएको छु ।’ 

उनले जनताको सेवामा निरन्तर लाग्ने भन्दै सरकारले जनताको भावनाविपरीत आन्दोलनलाई दबाउन खोजिरहेको अनुभूति भएको पनि उल्लेख गरेका छन् । ‘यसको नतिजा भयावह हुनेछ । मेरो जीवनको सबैभन्दा कालो दिन १,’ कडरियाले लेखेका छन् ।