काठमाडौँ- पूर्वराष्ट्रपति विद्यादेवी भण्डारीले सामाजिक सञ्जालमाथिको प्रतिबन्ध, भ्रष्टाचारविरुद्ध र सुशासनको मागसहित जेन-जी पुस्ताले सुरू गरेको आन्दोलनमा भएको हिंसात्मक घटनाप्रति दुःख व्यक्त गरेकी छन्।

मंगलबार विज्ञप्ति निकालेर उनले प्रहरीको गोली लागेर ठूलो संख्यामा विद्यार्थीले ज्यान गुमाएको घटनाबाट आफू मर्माहत भएको बताएकी छन् ।

उनले मृतकहरूप्रति श्रद्धाञ्जली अर्पण र पीडित परिवारप्रति समवेदना प्रकट गरेकी छन्। घाइतेहरूको शीघ्र स्वास्थ्यलाभको कामना गर्दै उनीहरूको निःशुल्क र गुणस्तरीय उपचार सुनिश्चित गर्न सरकारको ध्यानाकर्षण गराएकी छन्।

भण्डारीले आन्दोलनमा युवा पुस्ताले उठाएका मागलाई गम्भीरतापूर्वक आत्मसात गर्नुपर्नेमा जोड दिँदै भनिन्, ‘नेपाल सरकार, राजनीतिक दल र सरोकारवालाहरूले संवेदनशील भई वार्ता र संवादमार्फत समस्याको दिगो समाधान खोज्न आवश्यक छ।’

उनले हालको तनावलाई संवेदनशील ढंगले समाधान गर्न सरकार, सुरक्षानिकाय, राजनीतिक दल र नागरिक समाज सबैले मिलेर अघि बढ्नुपर्नेमा जोड दिएकी छन्।