काठमाडौं– नेकपा एकीकृत समाजवादी पार्टीले जेन–जी पुस्ताको आन्दोलनमा भएको दमनको निन्दा गरेको छ ।

पार्टीको केन्द्रीय कार्यालयमा बसेको बैठकपछि जारी विज्ञप्तिमा सरकारको सामाजिक सञ्जाल नियन्त्रण गर्ने निर्णय र त्यसविरुद्ध युवापुस्तामा बढेको असन्तुष्टिलाई वैधानिक आन्दोलनको स्वरूपमा लिनुपर्ने जनाएको छ ।

‘सामाजिक सञ्जाल नियन्त्रण गर्ने सरकारको अविवेकी निर्णयले नौजवान युवाहरू (जेन–जी पुस्ता) मा असन्तुष्टि पैदा भई भ्रष्टाचार तथा कुशासन विरोधी आन्दोलनको रूप लिएको हो । तर सरकार हिंसात्मक दमनमा उत्रिएको छ, जुन लोकतान्त्रिक मूल्यमान्यताको विपरीत छ’, महासचिव घनश्याम भुसालले भनेका छन् ।

भुसालद्वारा हस्ताक्षरित विज्ञप्तिमा लामो समयदेखि सुशासन र रोजगारीको अपेक्षा गरेका जनतालाई निराश पार्ने काम सरकारले गरेको उल्लेख छ। ‘जनताको आवाज सडकमा आउनु स्वाभाविक हो,’ विज्ञप्तिमा भनिएको छ ।

पार्टीले आन्दोलनमाथि भएको दमनको निन्दा गर्दै भ्रष्टाचार र कुशासनविरुद्ध युवाहरूको जागरणलाई सम्मान गर्ने प्रतिबद्धता जनाएको छ । साथै सरकारले युवाहरूको जायज माग सम्बोधन गर्नुपर्ने र कुनै पनि प्रकारको दमनकारी गतिविधि नगर्न चेतावनी दिएको छ।

समाजवादीले आन्दोलनलाई उत्तेजनामा पारेर मुठभेडतर्फ धकेल्ने वा जनसमर्थनलाई दुरुपयोग गर्ने प्रयासबाट सचेत रहन देशभरका आन्दोलनकारीलाई आह्वान गरेको छ ।