धनगढी – शनिबार राति भएको झडपपछि कैलाली कारागारको नेतृत्वमा परिवर्तन गरिएको छ। जेलर बसन्त खत्रीको स्थानमा जालन्धर भुसाललाई नियुक्त गरिएको हो।

जिल्ला प्रशासन कार्यालयका सूचना अधिकारी शिवराज जोशीका अनुसार भुसालले आइतबार दिउँसो ३ बजे कैलाली पुगेर औपचारिक रूपमा कार्यभार सम्हालेका हुन् ।

शनिबार राति कारागारमा भएको झडपमा एक कैदीको मृत्यु भएको थियो भने ४७ जना घाइते भएका थिए।

आइतबार दिउँसो पनि जेलभित्रको अवस्था असामान्य बनेको थियो। केही समयका लागि कैदीहरूले कारागार नियन्त्रणमा लिएका कारण स्थिति नियन्त्रणमा ल्याउन प्रहरीले कडा कदम चाल्नुपरेको थियो।

घटनाको कारण र पृष्ठभूमि पत्ता लगाउन सहायक प्रमुख जिल्ला अधिकारी किरण जोशीको संयोजकत्वमा पाँच सदस्यीय छानबिन समिति गठन गरिएको जिल्ला प्रशासन कार्यालयले जनाएको छ।