पोखरा– पोखरामा सुनको अवैध कारोबार फस्टाइरहेको पृष्ठभूमिमा प्रहरीले ‘अप्रेसन यल्लो मेटल’ सञ्चालन गरी ११ करोड रुपैयाँभन्दा बढीको सुनचाँदीसहित ११ जना भारतीय कालिगढलाई पक्राउ गरेको छ । तर, पोखराको बजारमा अवैध सुनको कारोबार चलाउने मुख्य व्यवसायीबारे प्रहरी मौन बसेपछि कालिगढ मात्रै पक्राउ पर्नुले अनुसन्धानको पूर्णतामाथि प्रश्न उठेको छ ।

गण्डकी प्रदेश प्रहरी र जिल्ला प्रहरी कार्यालय कास्कीको संयुक्त टोलीले शुक्रबार पोखराका मोहरिया टोल, तर्सापट्टी, भैरवटोल र चिप्लेढुंगाका विभिन्न पसल र कार्यस्थलमा एकसाथ छापा मारेको थियो । कास्की प्रहरी प्रमुख एसपी श्यामबाबु ओलियाका अनुसार लामो समयको गोप्य निगरानीपछि गरिएको यो अप्रेसनमा ६.४ किलो सुन, ४४४ तोला चाँदी र ५ लाखभन्दा बढी नगद बरामद भएको छ । बरामद गरिएको सुनको मात्र बजार मूल्य १० करोड ९४ लाख रुपैयाँभन्दा बढी छ ।

प्रहरीले पक्राउ परेका सबै भारतीय नागरिक भएको र उनीहरू वर्षौंदेखि पोखरामा सुनचाँदीको कालिगढ र डिजाइनरका रूपमा काम गर्दै आएको जनाएको छ । उनीहरूको साथबाट बरामद सुनको स्रोत खुलेको छैन ।

 ‘उनीहरू १५ वर्षदेखि पोखरामा बस्दै आएका रहेछन्,’ एसपी ओलियाले भने, ‘अहिलेसम्म यसको स्रोत खुलेको छैन र अनुसन्धान जारी छ ।’

पक्राउ पर्नेमध्ये भारत मेद्नापुरका गोविन्दा दिण्डाको साथबाट मात्रै २१० तोला सुन बरामद भएको छ । यस्तै, कलकत्ताका असित वरबाट ८६ तोला, प्रोभास माझीबाट ८८ तोला र दीपक सामन्तबाट ३८ तोला सुन बरामद गरिएको प्रहरीले जनाएको छ । अन्य पक्राउ पर्नेहरूमा राजेन्द्र जगताप, मनिकलाल आदक, सन्दीप ढाव, सोमनाथ पाल, तापस सामन्त, उज्ज्वल भोमिक र सुनिता पवार छन् ।

शनिबार आयोजित पत्रकार सम्मेलनमा एसपी ओलियाले पक्राउ परेका सबैलाई बरामद सामग्रीसहित थप अनुसन्धानका लागि राजस्व अनुसन्धान कार्यालय, बुटवल पठाइने जानकारी दिए । यो अप्रेसनले पोखरामा लुकिछिपी हुँदै आएको अवैध सुन कारोबारको एउटा ठूलो चक्र तोडेको प्रहरीको दाबी छ। 

यद्यपि, कालिगढहरू पक्राउ पर्दा उनीहरूलाई काम दिने र उनीहरूबाट सुन खरिद गर्ने ठूला व्यवसायीहरूमाथि अनुसन्धान कहिले पुग्छ भन्ने विषयमा भने प्रहरीले केही खुलाएको छैन ।