काठमाडौं– नेपाली कांग्रेसले तेह्रथुममा ४९ वर्षपछि पार्टीको चारतारे झण्डा फहराउन सफल नेतामाथि पनि कारबाही गरेको छ ।

गत निर्वाचनमा नेता–कार्यकर्तामाथि कारबाही गर्ने क्रममा कांग्रेसले तेह्रथुमका तुल्सी सुब्बालाई कारबाही गरेको हो ।

गत निर्वाचनमा विजयी सीता गुरूङलाई असहयोग गरेको आरोपमा उनलाई कांग्रेस केन्द्रीय अनुशासन समितिले एक वर्षका लागि पार्टीबाट निस्कासन गरेको छ ।

सुब्बा २०१५ को आमनिर्वाचनपछि ०६४ को संविधानसभा निर्वाचनमा तेह्रथुमबाट विजयी भएका थिए ।

यसबीचमा कांग्रेसले तेह्रथुम जहिल्यै गुमाउँदै आएको थियो । पूर्वमन्त्री सुब्बाविरुद्ध गत निर्वाचनका क्रममा सीता गुरुङलाई हराउने योजनासहित नेकपा एमालेका उम्मेदवार विजय सुब्बालाई सघाएको आरोप लागेको थियो ।