काठमाडौं- नेपाली कांग्रेसले निष्कासन गरेपछि नेपाली कांग्रेस खोटाङका जिल्ला सभापति विष्णुकमार राई सम्मानपत्र मिलेको प्रतिक्रिया दिएका छन् ।

केन्द्रीय अनुशासन समितिले बुधबार एक वर्षका लागि पार्टीबाट निष्कास गरेको पत्र दिएपछि उनले यस्तो प्रतिक्रिया दिएका हुन् ।

उनीमाथि २०७९ को निर्वाचनमा पार्टीलाई असहयोग गरेको आरोप लागेसँगै निष्कासित गरिएको हो।

कांग्रेसको उक्त निर्णयपछि सभापति राई राजनीतिमा सधैं प्राप्ति मात्रै नहुने, गुमाउनु पनि पर्ने बताएका छन् ।

‘राजनीतिमा सधैँ प्राप्ति मात्र हुँदैन, गुमाउनु पनि पर्छ । ३५ वर्षे निरन्तर राजनैतिक यात्रामा कहिले उकाली कहिले ओराली छिचोलियो’, उनले भनेका छन्, ‘२०७९ सालको गठबन्धनका क्रममा खोटाङ कांग्रेसलाई केन्द्रीय नेतृत्वबाट सुनियोजित ढंगले भएको ठूलो अन्याय र अपमान व्यहोर्नु पर्दा म स्वाभिमानी कार्यकर्ता विष्णुकुमार राईलाई त्यो विल्कुल सह्य हुने कुरो थिएन ।’

उनले केन्द्रीय कार्यसमितिको अन्यायविरुद्ध आफू डटेर लागेको स्वीकारेका छन् । ‘जसबापद् केन्द्रले महत्वपूर्ण सम्मान पत्र पठाएको छ । हार्दिक ग्रहण गर्दछु’, उनले भनेका छन्, ‘म सदैव स्वाभिमानी निष्ठावान खोटाङे कांग्रेसीहरुका साथमा छु, रहनेछु ।’