काठमाडौं– नेपाली कांग्रेसले गण्डकी प्रदेशका पूर्वमन्त्री कुमार खड्कालाई पार्टीबाट निस्कासन गरेको छ । केन्द्रीय अनुशासन समितिले उनलाई १ वर्षका लागि पार्टीबाट निस्कासन गरेको हो । 

अनुशासन समितिका संयोजक आनन्दप्रसाद ढुंगानाले महासमिति सदस्यसमेत रहेका खड्काले गत निर्वाचनमा पार्टीका आधिकारिक उम्मेदवारलाई हराउन भूमिका खेलेका कारण निस्कासन गरिएको जानकारी दिए । 

उनले अनुशासन समितिको असार ९–१७ गतेसम्म बसेको बैठकले स्थानीय तह, प्रदेश सभा र प्रतिनिधि सभा निर्वाचन २०७९ मा पार्टीका उम्मेदवार वा पार्टीले समर्थन गरेका उम्मेदवारविरुद्ध असहयोग गरी पराजित गराउने गलत मनसायका साथ सामाजिक सञ्जाल, अडियो-भिडियो लगायत अनेकन हत्कण्डाहरू प्रयोग गरिएका प्रमाणहरूका आधारमा कारबाही गरेको बताए ।