काठमाडौं– आन्तरिक मात्र नभई विदेशी पर्यटकको पनि प्रमुख गन्तव्य हो पोखरा । त्यसमा पनि फेवातालले धेरैलाई लोभ्याउँछ । माछापुच्छ्रेको छाँया देखिने फेवातालमा डुंगा सेयर गर्न कसलाई रमाइलो नलाग्ला र  !

फेवातालमा बढेको फोहोरले भने पर्यटकलाई खिन्न बनाउँछ । प्लास्टिक लगायत अन्य फोहोरले फेवातालको सौन्दर्यमा असर गरेको छ ।  विशेषगरी ड्यामसाइड क्षेत्रमा बढी फोहोरको समस्या रहेको छ ।

फेवातालको सुन्दरता बचाउन छोरेपाटनका केही युवा लागिपरेका छन्  । उनीहरू फेवातालको फोहोर हटाउँदै फोहोर नफाल्न सचेतना पनि बढाइरहेका छन् । करिब २० जनाको समूहले ड्याम साइड वरपरबाट ठूलो मात्रामा फोहोर संकलन गरेका छन् । उनीहरूले नियमित रूपमै सरसफाइ गर्ने गरेका छन् तर केही दिनमै फेरि जम्मा भइहाल्ने समस्या रहेको छ ।

यो ठाउँ पोखरा महानगरपालिकाको १७ नम्बर वडामा पर्छ । उनीहरूले समय-समयमा फोहोर उठाउने गरेका छन्  । महानगरपालिकाले फोहोर देखेर पनि कुनै चासो नराखेको उनीहरूको गुनासो छ  ।

मनसुनको समयमा पोखराको फोहोर फिर्के खोला हुँदै फेवातालमा आइपुग्छ । यसै गरी सुक्खा समयमा फेवातालको पानी घट्दा सबै फोहोर ड्याम साइडमा जम्मा हुन्छ ।

तस्बिरहरु : नेपाल फोटो लाइब्रेरी