काठमाडौं- प्रधानमन्त्री केपी शर्मा ओली सहभागी स्पेनमा आयोजित संयुक्त राष्ट्रसंघीय कार्यक्रममा मानव तस्करीको आरोप लगाएपछि नेकपा एमाले राष्ट्रिय स्वतन्त्र पार्टीका सांसदहरूबीच संसद्मा दोहोरी चलेको छ ।
बुधबार बसेको प्रतिनिधिसभाको बैठकमा रास्वपाकी सांसद सोबिता गौतमले प्रधानमन्त्री गएको कार्यक्रममा सहभागी नेपालका केही व्यक्तिहरू स्पेनमै लुकेको दोहोर्याएपछि एमाले सांसदहरू आक्रोशित भएका हुन् ।
एमालेका प्रमुख सचेतक महेश बर्तौलाले गौतमतिर लक्षित गर्दै केही सांसदहरूले भाइरल बन्न संसद्मा गलत कुरा प्रचार गर्दै हिँड्न थालेको बताएका छन् ।
बर्तौलाले रास्वपा सांसद गौतमसहितलाई लक्षित गर्दै कडा जवाफ फर्काएका हुन् । ‘संसद्मा यस्ता हावादारी कुरा गर्ने, हरेक दिन, हरेक बैठकमा दूषित समाचार सम्प्रेषणको स्रोत संसद्लाई बनाउन खोजिँदै छ’, उनले अगाडि भने ।
उनीभन्दा अगाडि बोलेकी एमालेकी सचेतक सुनिता बरालले पनि संसद्लाई अफवाह फैल्याउने थलो बनाइएको भन्दै रास्वपामाथि आक्रोश पोखिन् । उनले गलत कुराको टिप्पणी र प्रचार गर्ने ठाउँ संसद् नभएको जवाफ रास्वपाकी गौतमलाई फर्काइन् ।
प्रधानमन्त्री ओली स्पेन भ्रमणमा जाँदा केही मानिस उतै लुकेर नफर्किएको कुरा गौतमले दोहोर्याएपछि उनले आपत्ति जनाएकी हुन् ।
बरालले प्रधानमन्त्रीको स्पेन भ्रमणबारे अपवाह फैल्याइएको पनि बताइन् । बरालले संसदमा तथ्यका आधारमा बोल्न सुझाव दिइन्
‘तथ्यका आधारमा कुरा गरौँ, प्रधानमन्त्री दल विशेषको मात्रै हुँदैनन्’, उनले भनिन्, ‘राष्ट्रको कार्यकारी प्रमुखका रूपमा गएका हुन्छन् । तपाईंलाई भाषाको ज्ञान र परिभाषा सिकाउनु परे हामी तयार छौँ । बोल्दा हेक्का पुर्याउनुस् ।’
बरालले आफ्ना भनाइ राखिसकेपछि संसद्बाट गौतम बाहिरिएको कुरामा पनि कडा आपत्ति व्यक्त गरिन् । आफ्ना धारणा राखेर रास्वपा सांसदहरू बाहिरिएपछि बरालले अरुको कुरा सुन्ने धैर्यता नभएको भन्दै आपत्ति जनाएकी हुन् ।
प्रतिक्रिया