काठमाडौं– प्रमुख प्रतिपक्षी नेकपा माओवादी केन्द्रकी सांसद रेखा शर्माले लोकतान्त्रिक पद्धतिको अवलम्बन गरेर सरकारले संसद्मा पेस गरेको वार्षिक नीति तथा कार्यक्रम परिमार्जन गर्नुपर्ने बताएकी छन् । 

प्रतिनिधिसभाको शुक्रबारको बैठकमा नीति तथा कार्यक्रममाथिको छलफलमा भाग लिँदै उनले सरकारले लोकतान्त्रिक पद्धति अवलम्बन गरेर परिमार्जन गर्न सक्ने विधि अनुशरण गर्न सक्नु पर्नेमा जोड दिइन् ।

सांसद शर्माले सरकारको वार्षिक नीति तथा कार्यक्रम अमूर्त, अस्पष्ट र दिशाहीन भएको पनि टिप्पणी गरिन् । उनले माओवादी केन्द्र नेतृत्वको पूर्ववर्ती सरकारले अगाडि बढाएका राम्रा काम खारेज गरेको आरोप लगाइन् । 

‘नीति कार्यक्रम सुन्दै, पढ्दै गर्दा अलि बढी अमूर्त, अस्पष्ट, दिशानिर्देश नभएको, विगतको समीक्षा नगरिएको, विगतको सरकारले अगाडि बढाएका राम्रा सबै काम खारेज गरेको महसुस भएको छ,’ शर्माले भनिन् ।  

उनले समाजवादको आधार तय गर्न संविधानमा उल्लेख गरिएका विषयहरूमा सरकारको नीति तथा कार्यक्रम मौन रहेको पनि बताइन् । ‘संविधानमा उल्लेखित विषयहरू जसको कार्यान्वयनबाट समाजवादको आधार तय हुन्थ्यो, ती विषयहरूमा नीति कार्यक्रम मौन छ,’ सांसद शर्माले भनिन्, ‘उत्पीडित समुदायको पक्षमा सरकार उभिन सकेको छैन ।’