काठमाडौं– चार देशीय टी–२० अन्तर्राष्ट्रिय क्रिकेटमा प्रतियोगितामा नेपालले विजयी सुरुवात गरेको छ । 

हङकङको मिसन रोड क्रिकेट मैदानमा आज बिहान भएको खेलमा कतारलाई ८ विकेटले हराउँदै नेपालले सुखद सुरुवात गरेको हो ।

कतारले दिएको १ सय ५२ रनको लक्ष्य नेपालले १७ ओभरमा दुई विकेट गुमाएर पूरा गर्‍याे । 
नेपालका लागि कुशल भुर्तेलले सर्वाधिक ३८ रन जोडे । यस्तै, कप्तान रोहित पौडेलले ३७, आसिफ शेखले ३३ तथा बसिर अहमदले ३० रन बनाए । कतारका मुजिबर उर रहमानले दुई विकेट लिए ।

यसअघि टस हारेर पहिले ब्याटिङको निम्तो पाएको कतारले निर्धारित २० ओभरमा पाँच विकेटको क्षतिमा १ सय ५१ रन बनाएको थियो । 

कतारका कप्तान इक्रमउल्लाह खानले सर्वाधिक ५४ रनको अर्धशतकीय पारी खेले । यस्तै, शहजाद जामिलले ३१, मुजिब उर रहमानले २०, मोहम्मद इशदले १८ तथा अरुमुगागणेश नागराजनले १३ रनको योगदान दिए ।

नेपालका करण केसी, सोमपाल कामी, नन्दन यादव, गुल्शन झा र ललितनारायण राजवंशीले एक–एक विकेट लिए ।

प्रतियोगितामा नेपालसहित कुवेत, कतार र हङकङ सहभागी छन् । नेपालले बिहीबार कुवेतसँग खेल्नेछ ।