काठमाडौं – पूर्वराजा ज्ञानेन्द्र शाह आइतबार पोखराबाट काठमाडौं आउँदा त्रिभुवन अन्तर्राष्ट्रिय विमानस्थलमा ठूलो भीडले स्वागत गर्‍यो । यो भीड राजावादीहरुको शक्ति प्रदर्शन हो ।

विमानस्थलमा स्वागत गरेर उक्त राजावादीको भीडले ज्ञानेन्द्रलाई निर्मल निवाससम्म छोडेको छ । आजको प्रदर्शनमा राजावादीहरू उल्लेखनीय संख्यामा उपस्थित थिए ।

यो घटनालाई विभिन्न कोणबाट टिकाटिप्पणी र विश्लेषण भइरहेको छ । सबैको तर्कमा एक कुरा समान छ– पूर्वराजाको समर्थनमा उत्रिएको यो सबैभन्दा ठूलो भीड हो ।

यही भीडको दृश्य फिल्म ‘माग्ने राजा’मा समावेश हुने भएको छ । फिल्मका लेखक सामिप्यराज तिमल्सेनाका अनुसार विमानस्थालदेखि गौशलासम्म क्षेत्रको भीड फिल्मका लागि खिचिएको छ ।

फिल्ममा राष्ट्रका नाम जनसागर उत्रिएको दृश्य आवश्यक भएकाले आजको भीड उचित भएको उनको भनाइ छ । भन्छन्, ‘फिल्ममा राष्ट्रका नाममा जनसागर उत्रिएको दृश्य आवश्यक छ । पार्टीको झण्डाहरु नबोकेको भीडको दृश्य चाहिन्थ्यो । आज उपयुक्त दिन पर्‍यो ।’

पूर्वराजाको दृश्य भने फिल्ममा समावेश नहुने लेखक तिमल्सेना बताउँछन् । थप्छन्, ‘राजा वा राजावादी आन्दोलनको प्रसंग फिल्ममा छैन ।’

फिल्म ‘माग्ने राजा’मा नायक आर्यन सिग्देल, कलाकार केदार घिमिरे ‘माग्ने बूढा’, विल्सनविक्रम राई, नायिका वर्षा सिवाकोटी मुख्य भूमिकामा छन् ।

फिल्मको निर्देशक ऋषि लामिछाने र निर्माता मुनाल घिमिरे हुन् । प्रदर्शन मिति आगामी तीजलाई तोकिएको छ ।

यो पनि : ‘माग्ने राजा’ मा आर्यनको ‘एक्स्टेन्डेट केमियो’, कस्तो हो यो भूमिका ?