काठमाडौं- गत माघ २७ गते पोखरा गएका पूर्वराजा ज्ञानेन्द्र शाह आइतबार काठमाडौं फर्किएका छन् ।

उनी आइतबार दिउँसो ३ बजेर २० मिनेट समिट एयरको चार्टर्ड जहाज चढेर परिवारसहित काठमाडौं फर्किएका हुन् ।

उनी काठमाडौं आउने भएपछि दुई राजावादी दलहरू राष्ट्रिय प्रजातन्त्र पार्टी नेपाल र राष्ट्रिय प्रजातन्त्र पार्टीका अध्यक्ष नै विमानस्थल पुगेका छन् ।

कुनै बेला नेकपा एमाले र नेकपा माओवादी केन्द्रका प्रिय पात्र दुर्गा प्रसाईं पनि नयाँ राजावादीमा परिणत भएर विमानस्थल पुगेका छन् ।

राजावादीहरूले विमानस्थल क्षेत्रमा राष्ट्रिय झन्डासहित नाराबाजी गरिरहेका छन् । उनीहरूले प्रधानमन्त्री केपी शर्मा ओलीविरुद्ध पनि नाराबाजी गरिरहेका छन् ।

यसैबीच राजावादीहरूले पूर्वराजा ज्ञानेन्द्रको ठूलो फोटोसँगै भारतको उत्तरप्रदेश राज्यका मुख्यमन्त्री योगी आदित्यनाथको फोटोसमेत बनाएर जुलुसमा बोकेका छन् ।

यो तस्बिर प्रदीपविक्रम राणा नामका एकजना राजावादीले हिन्दु राज्य स्थापना माग गर्दै प्रदर्शन गरेका हुन् । यो तस्बिर चाबहिलबाट एयरपोर्टतर्फ आएकामध्येले बोकेर प्रदर्शन गरेका हुन् ।

पूर्वराजा शाह र योगीको ठूलो फोटोसहित उनीहरू विमानस्थल क्षेत्रमा पुगेका हुन् । यो फोटोलाई लिएर प्रधानमन्त्री ओलीका मुख्य सल्लाहकार विष्णु रिमालले पनि प्रश्न उठाएका छन् । उनले ‘राष्ट्रवादी महोदयहरूले ऱ्यालीमा प्रयोग गरेका यी २ फोटाहरू’, भनेर यो आन्दोलन कसको निर्देशनमा भएको हो भन्ने सन्देश दिन खोजेका छन् ।

तस्बिरहरू : नेपाल फोटो लाइब्रेरी