पोखरा – मुख्यमन्त्री सुरेन्द्रराज पाण्डेले न्यायिक सहजकर्ताले सर्वसाधारण नागरिकलाई न्याय निरुपणको सहज अनुभूति गराउने गरी सेवा दिनुपर्ने बताएका छन् । पाण्डेले स्थानीय तहमा पठाइएका सहजकर्ताहरूलाई न्याय सम्पादनमा सहजता ल्याउन समेत निर्देशन दिए ।

गण्डकी प्रदेश प्रशिक्षण प्रतिष्ठानको आयोजनामा आइतबार पोखरामा भएको स्थानीय तहमा न्याय निरुपण प्रक्रियामा देखिएका सवाल विषयक संवाद कार्यक्रममा मुख्यमन्त्री पण्डेले कानुनी ज्ञानको कमी, न्याय सम्पादनका समस्या तथा सही नियत हुँदाहुँदै देखिएको अफ्ठेरोलाई समाधान गर्न सहजकर्ता नियुक्त गरिएको बताए ।

प्रदेश सरकारले पालिका समेतको साझेदारीमा यो वर्ष ६३ पालिकामा न्यायिक सहजकर्ता नियुक्त गरेको छ । न्यायिक सहजकर्ता आएसँगै स्थानीय तहमा न्याय निरुपण सहज हुने अपेक्षा उपप्रमुख तथा उपाध्यक्षहरूले गरेका छन् ।

दुई चरणमा सञ्चालन हुने कार्यक्रमको पहिलो चरण आइतबार भएको छ । पहिलो चरणमा ४३ वटा पालिकाका न्यायिक समितिका संयोजक, सदस्य र भर्खरै नियुक्त भएका सहजकर्ता कार्यक्रममा सहभागी थिए ।

दोस्रो चरणको कार्यक्रम ४२ पालिकालाई समेटेर गरिने प्रतिष्ठानका कार्यकारी निर्देशक ऋषिराम पाण्डेले बताए । उनका अनुसार गत वर्ष न्यायिक समितिको कार्यविधि, प्रक्रियाका बारेमा प्रशिक्षण गराइएको थियो । यो वर्ष न्याय सम्पालदनमा सिलसिलामा देखिएका चुनौती र समस्याका बारेमा सम्वाद गरिएको उनले जानकारी दिए ।

न्याय सम्पादनका बारेमा भोगेका अप्ठेराका बारेमा जनप्रतिनिधिले अनुभव सुनाउँदा भर्खरै नियुक्त भएका सहजकर्तालाई पनि काम गर्न सजिलो हुने उनको भनाइ थियो । पूर्व सचिव रेश्मिराज पाण्डे र काशिराज दाहालले सहभागीलाई प्रशिक्षण दिएका थिए ।