पोखरा – थ्रीस्टार क्लब २४औं आहा रारा गोल्डकपको सेमिफाइनलमा पुगेको छ। पोखरा रंगशालामा आइतबार भएको दोस्रो क्वार्टरफाइनल खेलमा मच्छिन्द्र फुटबल क्लबलाई टाइब्रेकरमा ४–२ ले हराउँदै थ्रीस्टार अन्तिम चारमा प्रवेश गरेको हो। निर्धारित ९० मिनेट र थपिएको ३० मिनेटमा गोल नहुँदा टाइब्रेकरको सहारा लिनुपरेको थियो।

टाइब्रेकरमा मच्छिन्द्रका विशाल घलान र आदित्य शाक्यका प्रहार विफल हुँदा टोली पराजित भयो। घलानको प्रहार क्रसबारमा लाग्यो भने आदित्यको प्रहार थ्रीस्टारका सरिन जिसीले बचाए। मच्छिन्द्रका दिवाकर चौधरी र सनिश श्रेष्ठले गोल गरेका थिए भने थ्रीस्टारका दिपेश आले, एलेक्स, विराज महर्जन र लक्ष्मण रुचालले गोल गरे।

निर्धारित समयमा मच्छिन्द्रले थ्रीस्टारका गोलरक्षक अभिषेक बराललाई थुप्रैपटक चुनौती दिए। मनिष डाँगी, विमल घर्तीमगर र आन्द्रेस नियाले अवसर सिर्जना गरे पनि गोल गर्न सकेनन्। थ्रीस्टारका दिपेश घलेको प्रहार बारमा लागेर फर्किएको थियो।

थ्रीस्टारका प्रशिक्षक गणेश घिमिरेले पहिलो खेल भएकाले केही चुनौती आए पनि सेमिफाइनलमा सुधार गर्ने बताए। मच्छिन्द्रका प्रशिक्षक सन्तोष न्यौपानेले अवसरको सदुपयोग गर्न नसक्दा हार व्यहोर्नुपरेको बताए।

थ्रीस्टारले अब थन्डरबोल्ट नर्थ युनाइटेड र ब्ल्याक बुल्स एसपीबीचको विजेतासँग सेमिफाइनल खेल्नेछ। सोमबार चर्च ब्वाइज युनाइटेड र त्रिभुवन आर्मीबीच प्रतिस्पर्धा हुनेछ। प्रतियोगिताका विजेताले १२ लाख १ हजार तथा उपविजेताले ६ लाख १ हजार रुपैयाँ पुरस्कार पाउनेछन्।