क्यालिफोर्निया– अमेरिकाको लस एन्जलसको जंगलमा लागेको आगो हलिउड हिल्ससम्म उक्लिएको छ । जसका कारण विश्वकै प्रसिद्ध यो स्थानको पूरै क्षेत्रलाई खाली गराउन थालिएको छ।

डढेलो तीव्र गतिमा फैलिएपछि हलिउड हिल्सस्थित डल्बी थिएटर, हलीउड बाउल आउटडोर एम्फीथिएटर र हलिउड वाक अफ फेम संकटमा परेका छन्। अमेरिकी सरकारले यिनलाई खाली गराउन थालेको छ ।

डल्बी थिएटर त्यही स्थान हो, जहाँबाट एकाडेमी पुरस्कार समारोह आयोजित गरिन्छ ।

लस एन्जलसमा अहिले आगोका कारण हलिउड आसपासको सडकमा भागदौड मच्चिएको छ । मानिसहरू आफ्नो अनुहार छोप्नका लागि कपडाको प्रयोग गरिरहेका छन् । श्वास फेर्ने सजिलो उपायको खोजीमा मानिसहरू लागिरहेका छन् ।

कयौँ मानिसहरू सुटकेस लिएर अन्यत्र जाने कोसिसमा छन् । आगो पुगेको स्थानका सबैजसो सडक ट्राफिकले भरिएका छन् ।

यी सडकमा प्रतिष्ठित हलिउड बुलेवार्ड र हलिउड वाक अफ फेम पनि छन् । केही मानिस भाग्नका लागि गलत बाटो अपनाउँदा फसेका छन् ।