पोखरा- पोखरास्थित सूर्यदर्शन सहकारीको बचत रकम अपचलन मुद्दाका आरोपी राष्ट्रिय स्वतन्त्र पार्टी (रास्वपा) सभापति रवि लामिछानेसहित सात प्रतिवादीहरूको थुनछेक बहस सकिएको छ ।

बुधबार जाहेरवाला सहकारीपीडित पक्षका कानुन व्यवसायीले बहस गरेपछि बिहीबारका लागि सरकारी वकिलहरूको बहस बाँकी थियो । सरकारी वकिलले पनि जवाफी बहस सकेपछि अब आदेशको प्रतिक्षा भएको छ।

सरकारी वकिलको जवाफी बहस पनि सकिएपछि इजलासबाट न्यायाधीश नीतिज राईले प्रतिवादीसहितलाई बोल्ने अवसर दिएका थिए ।

हाल कास्की प्रहरीको हिरासतमा रहेका पूर्वगृहमन्त्री रवि लामिछाने, उनका साझेदार पूर्वडीआईजी छविलाल जोशीसहितको भविष्य न्यायाधीश नीतिज राईको हातमा रहेको छ ।

रविसहितका अभियुक्त पुर्पक्षका लागि जेल जान्छन् या बाहिरै बसेर मुद्दा लड्न पाउँछन् भन्ने कुराको टुंगो आजै साँझसम्म लाग्न सक्नेछ । यदि बहस नोट टाइप भइसकेमा न्यायाधीश राईले आजै साँझ आदेश दिनेछन् ।

बिहीबार थुनछेक बहसको अन्तिममा सरकारी वकिलहरूले वादीकातर्फबाट जवाफी बहस गर्दै सबै अभियुक्तलाई पुर्पक्षका लागि जेल चलानका लागि न्यायाधीशसमक्ष आग्रह गरे ।

त्यससँगै न्यायाधीश राईले रविसहितका अभियुक्तालाई बाँकी रहेको केही भएमा भन्ने अवसर दिएका थिए । इजलासमा रहेका एकजना अधिवक्ताका अनुसार न्यायाधीश राईले दिएको बोल्ने अवसरलाई पूर्वगृहमन्त्री लामिछानेले सदुपयोग गरे ।

उनले न्यायाधीश राईसमक्ष आफूलाई तारेखमा पठाउने आदेश आएमा सहकारी पीडितिहरूको न्यायका लागि लड्ने वचन दिए ।

स्रोतका अनुसार उनले इजलासमा उभिएर भने, ‘श्रीमान् तारेखमा पठाउने आदेश दिनु भएमा सहकारी पीडितलाई न्याय दिन मन छ ।’

उता जिल्ला अदालत कास्कीका सूचना अधिकारी सुरज अधिकारीले बहस सकिएकाले आजै पुर्पक्षसम्बन्धी आदेश आउने सम्भावना रहेको बताए ।

‘सरकारी वकिलको जवाफसँगै सबै बहस सकिएको छ’, उनले भने, ‘आजै साँझसम्म सबै प्रतिवादीबारे पुर्पक्षसम्बन्धी आदेश आउन सक्छ ।’

यस प्रकरणमा तीन सातादेखि निरन्तर न्यायाधीश नीतिज राईको इजलासमा सुनुवाइ भइरहेको थियो । रास्वपा नेता कार्यकर्ताले यो मुद्दा नटिक्ने जिकिर गरिरहेका बेला रविले इजलासमा तारेखमा छोडिदिनका लागि न्यायाधीशलाई भनेका हुन् ।