काठमाडौं– त्रिभुवन विश्वविद्यालयका रेक्टर प्रा.डा. खड्ग केसीले नेपालमा भएको जेन–जी आन्दोलन भ्रष्टाचार, कुशासन र जवाफदेहिताको अभावको परिणाम भएको बताएका छन्।

शनिबार अन्तर्राष्ट्रिय सम्बन्ध सरोकार समुदाय नेपालले कीर्तिपुरमा आयोजना गरेको ‘जेन–जी आन्दोलनपछिको नेपालको राजनीतिक पद्धति र परराष्ट्र नीति’ विषयक गोष्ठीमा बोल्दै उनले अहिलेको राजनीतिबाट आइडियोलोजी भन्दा बढी सुशासन र जवाफदेहिता आवश्यक रहेको बताए।

उनले भदौ २३ र २४ गतेको जेन–जी आन्दोलन मास फ्रस्टेसनको परिणाम भनेका छन् । ‘युवाले डिजिटल प्लेटफर्मबाट सपना देखे तर निराश हुनुपरेका कारण आन्दोलन भयो’, उनले भने ।

प्रा। केसीले नेपालका नेताहरू पारदर्शिताको नियम र अनुशासन पालनामा चुकेको बताएका छन् । त्यहीकारण राजनीतिमा भ्रष्टाचार मौलाएको उनले बताए। उनले भने, ‘हामी १०००–१५०० डलर प्रतिव्यक्ति आम्दानी गर्छौं, तर सपना ४० हजार डलरका देख्छौँ । त्यसैले युरोप-अमेरिका झैं धनी नहुँदै जन्मदर घटेको हो।’

उनले ‘नेपो बेबी’ र ‘नेपोटिजम’ जस्ता प्रवृत्तिहरूले युवामा आक्रोश बढाएको उल्लेख गर्दै भने, ‘राजनीतिमा जवाफदेहिता नभए भ्रष्टाचार हुन्छ । यही कारणले समाजमा असमानता र अन्याय बढेको छ।’

भदौ २३ गतेको आन्दोलनलाई उनले जायज बताए पनि २४ गतेको आगजनी र तोडफोड अस्वीकार्य भएको उनले बताए । ‘जसले त्यो विध्वंस गरे, संलग्न भए, तिनीहरूलाई कानूनी कारबाही हुनुपर्छ,’ उनले भने ।

प्रा. केसीले जनतालाई परिवर्तनका लागि पुराना नेताहरूलाई चुनावमा हराउन आह्वान गरे। उनले भने, ‘संविधानमा समाजवाद र साम्यवादका कुरा गरेर दलाल पुँजीवादको वकालत भइरहेको छ। खराब नेतालाई अब हराउनुपर्छ।’

उनले नयाँ पुस्तालाई देशप्रतिको माया र जिम्मेवारीको चेतना दिनुपर्नेमा जोड दिए। ‘विदेशी मित्रसँग संगत गर्दा मुलुकको माया नभुलौं,’ उनले भने, देश अझै सुधारिन सक्छ, त्यसका लागि संस्कार निर्माण, सुशासन र भ्रष्टाचारविरुद्ध कठोर अभियान जरुरी छ।’

प्रा. केसीले अबको चुनौती संस्कार निर्माण रहेको बताएका छन् । युवालाई देशको गौरवगाथा पढाउनुपर्छ, र उनीहरूमा देशप्रतिको गर्व जगाउनुपर्छु, उनले भने ।