जेरूसेलम– इजरायली गुप्तचर निकायले हमासको अपहरणमा परेका नेपाली युवक विपिन जोशीको नयाँ भिडियो प्राप्त गरेको जनाएका छन् । उक्त भिडियो बुधबार साँझ सार्वजनिक गरिने उनको परिवारले पुष्टि गरेको छ ।

इजरायली होस्टेज फ्यामिली फोरमका अनुसार, गत वर्ष अक्टोबर ७ मा किब्बुत्ज अलुमिमबाट अपहरणमा परेका नेपाली नागरिक विपिन जोशीको भिडियो इजरायली गुप्तचर इकाईहरूले प्राप्त गरेका छन् ।

जोशी परिवारले जारी गरेको विज्ञप्तिमा भनेको छ, ‘गाजाबाट प्राप्त यो जीवनको प्रमाणले हामीलाई उहाँ जीवित हुनुहुन्छ भन्ने अटुट विश्वास दिएको छ।’

विपिन जोशी अक्टोबर ७ को नरसंहार हुनुअघि मात्र तीन हप्ता अघि कृषिसम्बन्धी शिक्षा कार्यक्रममा सहभागी हुन इजरायल पुगेका थिए। उनी अन्य नेपालीहरू बसोबास गरेको किब्बुत्ज अलुमिमबाट अपहरणमा परेका थिए।

वाल स्ट्रिट जर्नलले सन् २०२३ नोभेम्बरमा प्रकाशित रिपोर्टमा उल्लेख गरेअनुसार जोशीले आफ्नो शरणस्थलमा लुकेका सबैको ज्यान बचाएका थिए । 

रिपोर्टका अनुसार दुई वटा ग्रिनेड कोठाभित्र छिरेपछि उनले एउटा समातेर बाहिर फ्याँकेका थिए । तर अर्को विस्फोट हुँदा उनका पाँच साथीसाथी गम्भीर घाइते भएका थिए ।