काठमाडौं– नेकपा एमालेका नेता महेश बस्नेतले बालेन शाहको योजनामा केपी ओली, रमेश लेखक र आफूलाई पक्राउ गर्न प्रशासनलाई दबाब दिइएको आरोप लगाएका छन् ।  

बुधबार एमाले पार्टी केन्द्रीय कार्यालय च्यासलमा पत्रकार सम्मेलन गर्दै बस्नेतले बालेनको योजनामा ओली, लेखक र आफूलाई गिरफ्तार गर्न सुदन गुरुङजस्ता मान्छेहरूले प्रशासनलाई दबाब दिइएको आरोप लगाएका हुन् ।

उनले जेन-जी आन्दोलनका नाममा अन्तर्राष्ट्रिय शक्तिका एजेन्डाहरूले राज्य संयन्त्रलाई कब्जा गर्न खोजेको टिप्पणी गरे । सुदन गुरुङजस्ता मान्छेहरूलाई एम्बुस बनाएर पड्काउने प्रयास भएको उनको भनाइ छ । बस्नेतले बालेनको योजनामा नै नेताहरूको घरदेखि अन्य संरचनामा तोडफोड र आगजनी गराइएको बताए ।

अहिले पनि साइबर अपराधमार्फत लुटपाटका धन्दा चलिरहँदा गृह प्रशासन त्यसलाई संरक्षण गर्न लागेको उनले बताए ।

भिडियोमा हेर्नुहोस् :

बस्नेतले जेन-जी आन्दोलनको क्रममा भएको घटनाको छानबिन गर्न आयोग बनेको अवस्थामा निष्पक्ष छानबिनका लागि दोषीमाथि कारबाही गर्नुपर्ने माग गरे । 

उनले विभिन्न षडयन्त्र गरेर आफूलाई गिरफ्तार गर्ने योजनालाई अदालतले फिर्ता गरेको जिकिर गरे । प्रमाण नपुग्ने भनेर तामेलीमा राखेको मुद्दा अहिले दबाबमा खोलिएको आरोप लगाउँदै बस्नेतले बुधबार नै आफूले बयान दिएर आएको जानकारी दिए ।  

उनले फुलपातीको दिनदेखि अहिलेसम्म आफूलाई पक्राउ गर्न दबाब दिइएको भन्दै आफूलाई पक्राउको कुनै डर नभएको जिकिर गरे । बस्नेतले जेनजीको नाममा अराजकता मच्चाउने विरुद्ध देशव्यापी अभियान चलाइने उल्लेख गरे । 

यो पनि पढ्नुहोस् :