काठमाडौं – जेनजी आन्दोलनका क्रममा देशभरका विभिन्न स्थानमा थुप्रै युवा तथा विद्यार्थीको ज्यान गुमेपछि निजी विद्यालय संगठन र शिक्षासम्बन्धी विभिन्न संस्थाहरूले संयुक्त विज्ञप्ति जारी गर्दै दुई दिन शोक विदा दिने घोषणा गरेका छन् ।

एनएमए, अपेन, हिसान, नेशनल प्याब्सन र प्याब्सनले सोमबार विज्ञप्ति जारी गर्दै भाद्र २४ र २५ गते विद्यालयहरू बन्द गरी शोक विदा मनाउने जनाएका छन् ।

संयुक्त विज्ञप्तिमा आन्दोलनका क्रममा विद्यार्थीहरूको निधन हुनु अत्यन्तै दुःखद र पीडादायी भएको उल्लेख गर्दै दिवंगत आत्माप्रति श्रद्धाञ्जली र परिवारजनप्रति गहिरो समवेदना प्रकट गरिएको छ । साथै, उपचाररत घाइते विद्यार्थीहरूको शीघ्र स्वास्थ्यलाभको कामना पनि गरिएको छ ।

विज्ञप्तिमा भनिएको छ, “यस अकल्पनीय घटनाले केवल शैक्षिक क्षेत्र मात्र होइन, समग्र नेपाली समाजलाई स्तब्ध बनाएको छ । यस्तो विषम परिस्थितिमा सबै पक्ष संयमित र धैर्यवान बनी सामाजिक शान्ति, सद्भाव र सहिष्णुता कायम गर्न सहयोग गर्नुपर्ने आवश्यकता छ।”

संयुक्त विज्ञप्तिमा एनएमए अध्यक्ष पवित्रा लिम्बु, अपेन अध्यक्ष बद्री दाहाल, हिसान कार्यवाहक अध्यक्ष युवराज शर्मा, नेशनल प्याब्सन अध्यक्ष सुवाष न्यौपाने र प्याब्सन अध्यक्ष कृष्णप्रसाद अधिकारीको हस्ताक्षर रहेको छ ।