काठमाडौँ- गृहमन्त्री रमेश लेखक प्रधानमन्त्रीको सरकारी निवास बालुवाटारमा बसेको राष्ट्रिय सुरक्षा परिषद्को बैठकमा सहभागी भएर बूढानीलकण्ठ पुगेका छन् ।

सोमबार जेन-जी पुस्ताले गरेको प्रदर्शनका क्रममा प्रहरीसँग भएको झडपमा कम्तीमा पनि १९ जनाको ज्यान गएको अवस्थामा गृहमन्त्री लेखक कांग्रेस सभापति शेरबहादुर देउवासँग संवादका लागि बूढानीलकण्ठ पुगेका हुन् ।

उनी सिंहदरबारबाट सुरक्षा प्रमुखहरूसहित बालुवाटार पुगेका थिए । बालुवाटारमा सुरक्षा परिषद्को बैठक सकिएपछि उनी बूढानीलकण्ठ गएका हुन् ।

लेखक बालुवाटारमै जारी संघीय मन्त्रिपरिषद्को बैठकमा देखिएका छैनन् । बूढानीलकण्ठमा नेपाली कांग्रेस पदाधिकारी र पूर्वपदाधिकारीको बैठक राखिएको छ। उक्त बैठकमा लेखकलाई पनि बोलावट भएको हो ।

बैठकमा कांग्रेसबाट सरकारका नेतृत्वकर्ता उपप्रधानमन्त्री तथा सहरी विकासमन्त्री प्रकाशमान सिंह पनि सहभागी छन् ।

सोमबार १९ जनाको ज्यान जाने गरी दमन भएपछि गृहमन्त्री लेखकमाथि राजीनामाको दबाब बढेको छ।

उक्त घटनापछि उनले सुरक्षा प्रमुखहरूको पनि ब्रिफिङ लिएका थिए । स्रोतका अनुसार उनलाई सुरक्षा प्रमुखहरूले जेन-जीको आन्दोलनमा यो तहको घूसपैठ होला भन्ने आफूहरूले नसोचेको बताएका छन् ।