झापा- जेन-जी समूहले झापा दमकमा रहेको प्रधानमन्त्री केपी शर्मा ओलीको घरमा समेत आक्रमण गरेका छन् ।

प्रहरीको कडा सुरक्षा व्यवस्था बनाइएको ओलीको घरमा जेनजी समूहले आक्रमण गरेका छन् ।

आक्रमणमा धेरै क्षति नभएको एमाले झापा जिल्ला अध्यक्ष प्रेम गिरीले बताए । गिरीका अनुसार उक्त स्थानमा बिहानबाटै कडा सुरक्षा निगरानी गरिएको छ ।

‘उहाँहरूले आँखा लगाउनुभएको थियो । तर थप क्षति हुन पाएन । सामान्य रूपमा आक्रमण भएको छ,’ गिरीले खबरहबलाई भने, ‘दमकमा अहिले सुरक्षा व्यवस्था कडा पारिएको छ ।’

ओलीको घर दमक नगरपालिका वडा नम्बर ९ मा पर्छ। यता दमक बजारमा पनि नयाँ पुस्ताले आन्दोलन गरेको छ । प्रदर्शनका क्रममा केही युवा घाइते भएका छन् ।

यता बिर्तामोडमा पनि यो पुस्ताले आन्दोलन गरेको छ । केही युवा घाइते भएर बीएण्डसी अस्पतालमा उपचार भइरहेको छ ।