काठमाडौँ- राजावादीहरूले २०८१ चैत १५ गते गरेको प्रदर्शनमा जस्तै जेन-जीहरूले सोमबार गरेको विरोधमा पनि सरकारी संयन्त्र असफल भएको देखिएको छ।

सुरक्षामा तैनाथ प्रहरी र सशस्त्र प्रहरी सरकारी संरचनाको सुरक्षा दिनै असफल भएको देखिएको छ।

सुरक्षाकर्मी असफल भएको कुराको पुष्टि नयाँबानेश्वरको संसद् भवन क्षेत्रको दृश्यले गरेको छ । त्यहाँ नेपाल प्रहरी र सशस्त्र प्रहरी तैनाथ भए पनि प्रदर्शनकारीसँग निरीह सावित भएका हुन् ।

प्रदर्शनकारीहरू सशस्त्रकै सेन्ट्री पोस्ट र संसद् भवनको मुख्य गेटबाट भित्र छिरेका छन् । युवाहरूले एकसाथ प्रवेश गर्न खोज्दा सुरक्षामा तैनाथ सुरक्षाकर्मी बिफल भएका हुन् ।

युवाहरूले संसद् भवनमा छिर्न पर्खालमा सुरूङ नै खनेका छन् । दर्जनौँ युवाले बाँस र रडको प्रयोग गरेर दक्षिण गेट क्षेत्रको पर्खाल भत्काएर सुरुङ नै खनेका हुन्।