काठमाडौँ – सिरहाको कल्याणपुर नगरपालिकाका नगरप्रमुख रामपुकार साह तेलीलाई भ्रष्टाचार मुद्दा लागेको छ ।

नाली निर्माणको भुक्तानीबापत एक लाख रुपैयाँ घुस लिँदालिँदै साहलाई अख्तियार दुरुपयोग अनुसन्धान आयोगको टोलीले गत असार ३२ गते पक्राउ गरेको थियो ।

पक्राउ परेका साहले नगरपालिकाको वडा नं. ६ स्थित नाला निर्माण योजनाको कार्य सम्पन्न भई भुक्तानी गर्ने क्रमका सेवाग्राहीसँग बिचौलियामार्फत्‌ घुस मागेका थिए ।

आयोगको कार्यालय, बर्दिवासबाट खटिई गएको टोलीले साहलाई सेवाग्राहीबाट एक लाख रुपैयाँ घुस लिइसकेको अवस्थामा रकमसहित नियन्त्रणमा लिएको थियो ।

साहलाई भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुरमा एक लाख रुपैयाँ बिगो कायम गरी भ्रष्टाचार निवारण ऐन, २०५९ को दफा ३ को उपदफा (१) को देहाय (ख) बमोजिम कैद र सोही ऐनको दफा ३ को उपदफा (१) अनुसार बिगो बमोजिम जरिवाना सजाय मागदावी गरिएको छ ।

आयोगले उनीविरुद्ध आज (शुक्रबार) विशेष अदालत, काठमाडौंमा आरोपपत्र दायर गरेको हो । साह २०७९ सालको निर्वाचनमा नेकपा एमालेबाट निर्वाचित भएका थिए।