कञ्चनपुर– नेकपा (एमाले) की पोलिटब्युरो सदस्य निरु पालले अध्यक्ष केपी केपी शर्मा ओलीबिना एमाले र एमालेबिना नेपालको समृद्धि कल्पना गर्न नसकिने बताएकी छन्।

प्रेस चौतारी नेपाल, सुदूरपश्चिम प्रदेशद्वारा आयोजित प्रदेशस्तरीय प्रशिक्षण तथा दोस्रो पूर्ण बैठकलाई महेन्द्रनगरमा सम्बोधन गर्दै नेतृ पालले यस्तो बताएकी हुन् ।

उनले पार्टीभित्र कतिपय भ्रमपूर्ण कुरा उठिरहेका पनि बताएकी छन् । ‘केपी ओलीबिनाको एमाले, एमालेबिनाको नेपाल र समृद्धि कल्पना बाहिरको कुरा हो। यो सपना कोही कसैले नदेखे हुन्छ’, उनले थपिन् ।

उनले पार्टीका सबै कार्यकर्ता र नेताहरू ओलीको नेतृत्वमा प्रतिबद्ध रहेको दाबी गर्दै भनिन्, ‘यो सन्देश र समर्थनमा हरेक एमालेजन तयार छन् र हुन्छन्।’

नेतृ पालले साउन ५–६ गते ललितपुरको च्यासलमा सम्पन्न एमाले केन्द्रीय कमिटी बैठकले दिएको सन्देशलाई नै आगामी महाधिवेशनको सार र संकेतको रूपमा बुझ्नुपर्ने बताइन्।

उनले पार्टीको विधान र संरचना अनुरूप नै निर्णयहरु भइरहेका बताइन् । नेतृत्वको विषयमा अनावश्यक हल्ला र भ्रम फैलाउने प्रयास अर्थहीन रहेको उनको तर्क छ।