जनकपुरधाम– बजेटको विषयमा भइरहेको विवाद सुल्झाउन मधेस सरकारले डाकेको सर्वदलीय बैठक निष्कर्षविहीन भएको छ । 

मुख्यमन्त्री तथा मन्त्रीपरिषद्को कार्यालयमा मंगलबार बसेको सर्वदलीय बैठक निष्कर्षविहीन भएर टुंगिएको हो । 

सत्तारुढ दल र प्रतिपक्षी दलहरूबिच सहमति जुट्न नसकेपछि बैठकले मूर्तरुप लिन नसकेको प्रतिपक्षी दल जनता समाजवादी पार्टी नेपाल (जसपा)का प्रदेश सांसद राम अशिष यादवले जानकारी दिए ।  

उनका अनुसार सरकार पक्ष जिम्मेवार ढंगले प्रस्तुत नभएपछि सर्वदलीय बैठक बिना निष्कर्ष टुंगिएको हो । 

उनले भने,‘ सरकार आफ्नो अडान बाट पछि हट्नै चाहेन । हामीले बिचौलीयाको प्रभावमा ल्याइएको बजेट पुनर्लेखनको माग राखेको छौ । सरकार पक्षले कुनै लचकता न अपनाएको कारण बैठक बिना निष्कर्ष टुंगिएको हो ।’ उनले आज पनि सदन अवरुद्ध गर्ने बताए ।

बजेट पास गर्नुपर्ने समय घर्किँदै गए पनि बजेटमा बिचौलिया हाबी भएको भन्दै सदनमा सधैँ विरोध हुन थालेपछि मुख्यमन्त्री सतिश सिंहले सर्वदलीय बैठक डाकेका हुन् । 

सर्वदलीय बैठकका सत्तारुढ दलहरू कांग्रेस, एमाले, जनमत, लोसपासहित विपक्षी दलहरू माओवादी केन्द्र, जसपा नेपाल, एकीकृत समाजवादी, राप्रपा, नागरिक उन्मुक्ति र संघीय समाजवादी पार्टीको उपस्थिति रहेको थियो ।  विपक्षी ६ दलले बजेटमा बिचौलिया हाबी भएको आरोप लगाउँदै व्यक्ति केन्द्रित बजेट रहेको तर्क दिँदै आइरहेका छन् ।