काठमाडौं– नेपाली कांग्रेसकी सांसद प्रतिमा गौतमले जापानको भिसा पाइसकेका नेपाली प्रशिक्षार्थी कामदारहरूलाई श्रम स्वीकृति दिने नाममा नेपालमै फेरि अनाधिकृत भाषा परीक्षा दिन बाध्य पारिने विषय संसद्मा उठाएकी छन् ।

प्रतिनिधिसभाको मंगलबारको बैठको शूनय समयमा उनले उक्त विषयसँग जोडिएको सिन्डिकेट बारेमा संसद्को ध्यानाकर्षण गराएकी हुन् ।

‘म आज, जापानको भिसा (सीओई) पाइसकेका नेपाली प्रशिक्षार्थी कामदारहरूलाई श्रम स्वीकृति दिने नाममा नेपालमै फेरि अनधिकृत भाषा परीक्षा दिन बाध्य पारिने घटनासँग जोडिएको सिन्डिकेट बारेमा ध्यानाकर्षण गराउन चाहन्छु,’ सांसद गौतमले भनिन् ।

उनले हजारौँ युवाको रोजगार सपनासँग जोडिएको उक्त विषयमा सरकार टुलुटुलु हेरेर चुप रहन नमिल्ने भन्दै अनाधिकृत सिन्डिकेट तुरुन्त खारेज गर्न र सिन्डिकेटमा संलग्नमाथि कारबाही गर्न माग गरिन् ।

उनले भनिन्, ‘वैदेशिक रोजगार प्रक्रिया पारदर्शी, प्रभावकारी र युवामैत्री बनाउन माग गर्दछु ।’

सांसद् गौतमले जान नामक संस्थामार्फत् विगत १५ वर्षदेखि चलिरहेको सिन्डिकेटको विभिन्न तथ्य मिडियामार्फत् उजागर भएको पनि सदनलाई जानकारी गराइन् ।

‘यो विषयमा पटक–पटक वैदेशिक रोजगार व्यवसायीहरू, उपभोक्ता अधिकारवादी र मिडियाका तर्फबाट सरकारको ध्यानाकर्षण गराइए पनि सुनुवाइ सुधार केही भएन,’ उनले भनिन् ।